عصفور

إحكيلي يا عصفور ..عن قصص الهوا و النور
عن سما و طبق بنور ..بتلف فيه و تدور
إحكيلي يا عصفور.. عن صبح يصحصح قلبك
و بهمس حنانه يحبك .. و بضي الفجر يصالحك
إحكيلي يا عصفور .. إزاي بتصحي الشمس؟
و إزاي تهمسلك همس؟.. بشعاعها: أنا ضد اللمس
إحكيلي يا عصفور.. عن قصص الخير و الشر
عن تمساح جوا النهر .. و السمكة في قلب البحر
إحكيلي يا عصفور .. عن ليل بيطمن قلبك
و ليلاتي بيفضل جنبك.. و بيفهم آهة تعبك
إحكيلي يا عصفور .. عن أحلام غير أحلامي
عن أوطان غير أوطاني.. و كلامهم زي كلامي
إحكيلي يا عصفور ..عن قصص الشتا و الصيف
و ربيع و كأنه ضيف.. بيمر كأنه خريف
إحكيلي يا عصفور .. عن زهرة في قلب الصخر
عن نسمة في عز الحر ..بتلطف نار القهر
إحكيلي يا عصفور.. إزاي بتطير و تغرد؟
و إزاي في أغسطس تبرد؟..و إزاي المية بتجمد؟
إحكيلي يا عصفور .. عن قصص النار و النور
و فراش بيحب زهور.. بيطير و بيرمي بذور
إحكيلي يا عصفور.. عن تربة مبتطرحش
و ورود مبتفتحش .. و جذورها مبتسرحش
إحكيلي يا عصفور.. عن حلم حلمته إمبارح
عن هدهد بجناحه سارح .. إصطاده الطير الجارح
إحكيلي يا عصفور .. عن حكايات الأساطير
عن أقفاص للعصافير .. مفروشة ذهب و حرير
إحكيلي يا عصفور .. إزاي فتحت أقفاصها؟
وإزاي عرفت مفتاحها؟ ..و إزاي طارت بجناحها؟
إحكيلي يا عصفور
إحكيلي و سلي منامي عايزة أصحى ألاقيك قدامي
تحكيلي يا عصفور
..عن قصص الهوا و النور
..عن قصص الخير و الشر
..عن قصص الشتا و الصيف
..عن قصص النار و النور
..عن حكايات الأساطير و إزاي بتنوح و تطير؟