هاتلي معاك

هاتلي معاك كام كيلو حنية
و نقي منهم أي نية مش هي
و هاتلي كمان عشر عصافير
… و نسمة حرير
و فصَّلها على مقاسي
و بالطو تقيل لإحساسي

و هاتلي كمان كتاب حواديت
و ركبهم على الأحلام
و شغلهم منين ما أنام
يودوني لآخر الكون
… و أنا ف البيت

و سيبني أنام ليوم العيد
و حط البالطو و الفستان
أفتَّح ألقي لبس جديد
و أشوف الدنيا بالألوان
و الأقي الزيطة و الزحمة
بطعم العيلة و اللمة

و جيب ضحكاية بتكركع
… بدون حسابات
و هات كلمات
م الغالية وم الأصلي
… و هات فصلي!
و كراستي و أقلامي
و حط ده كله قدامي

و هات نجماية بتلعلع
و الزقها على قورتي
… و صورني!
و علّق عالملأ صورتي
… و قدرني!
و خلي النجمة تهديني
لسكك كل شيء نافع
و قول للصورة تحييني
ف أرض أدوسها ف الواقع

و هات قلبك و قلب الناس
و افتحهوملي ف الكراس
و خططهم خطوط باينة
و أرسم فيهم الدنيا
بلون أخضر لنقط الخير
و حطلي فيهم العصافير
و خطط إسود كل الشر
عشان مش عايزة تاني اتضر

و هاتلي يا ريت قلبي معاك
ما أصلي نسيته ع الشباك
… فراح واقع
و شوف نبضه لو إنت هناك
ليطلع باظ
… و مش نافع!